1,5 kg amuarrain, garbi eta zabaleran bitan zatituak
Irina eta frijitzeko olioa
2 tipulin eder, zerrendatan moztuak
8 baratxuri xister, osorik
Urdaiazpiko serranoa, gizenez ongi hornitutako xerra bat
Erramua, hosto fresko bat
Ezkia, erromeroa eta salbia
10 koilarakada oliba olio
Koilarakada bat piperrauts gozo
Koilarakada erdia piperrauts min
Litro erdia oliba olio birjina
Litro laurdena sagardo-ozpin
Litro laurdena ardo zuri
Gatza

Amuarrainen kasuan, hobe dugu arrain-saltzaileak zatitzea. Gatza eman, irinetan azaletik pasa eta olio ugarian frijituko ditugu amuarrainak. Xukatu eta geroko gordeko ditugu.
Kazola handi bat sutan jarri, koilarakada batzuk oliba olio isuri, tipulinak, baratxuriak eta urdaiazpiko xerra bitan zatitua ipini eta, gatz pixka bat eman ondoren, su eztian edukiko dugu dena frijitzen, 10 bat minutuan. Piperrautsa, belar lurrintsuak eta erramua gaineratuko ditugu ondoren. Nahasi eta oliba-olio birjina, sagardo-ozpin eta ardo zuriaren txanda izango da hurren. Irakin eta beste 5 bat minutuan utziko dugu dena egosten, ozpinak indarra gal dezan. Sua itzali eta epeltzen utziko dugu ondoren eskabetxea. Une horretan kazolaratuko ditugu amuarrainak, lehor ez daitezen. Beste 5 bat minutuan edukiko ditugu su eztian, irakiten utzi gabe. Sutatik atera eta hozten utziko dugu ondoren guztia.
Hoberena dugu dena prestatu eta jakiari gutxienez 12 orduz epeltzen utzi ostean ohore egitea. Amuarrainak behar bezala bustiko dira ordurako zuku horretan. Patata egosi batzuk izan daitezke lagungarri ona: eskabetxearen barazki eta zukuarekin onduko ditugu, gatz pixka batekin.

Etiketak: Amuarraina

Istorio hau 2007 Azaroa 12 egunean 21:00-etan argitaratua eta ARRAINAK ataletan sailkatua izan zen. Istorio honi gehituriko iruzkinen jarraipena RSS 2.0 jarioaren bitartez egin. Nahi baduzu, iruzkin bat idatzi dezakezu edo zure webgunetik trackback egin istorio honi.