Tartak egiteko molde bat, hondoa hostorez estalita. Moldetik zentimetro batzuk kanpora atera behar du hostoreak
Hostore disko bat, pixka bat txikiagoa, tarta estaltzeko
8 errege sagar garratz, errezil-sagarrak
Gurina, puska eder bat
2 adaxka bainila natural
Arrautza bat eta arrautza gorringo bat
2 koilarakada azukre
Limoi erdi baten birrindura

Zuritu eta laurdenetan zatituko ditugu sagarrak, labana zorrotz batez barneko zuztarra kendu ondoan. Padera handi batean, sutan ipiniko dugu gurina, su eztian, eta erantsiko ditugu sagar laurdenak, bainila adaxkak bitan irekiak eta haien barneko aleak. Su eztian edukiko dugu guztia, gorritu eta bainila eta gurinaren usaina hartu arte. Hasieran hobe da arin-arin gorritzea, karamelu kolorea har dezaten, eta gero egingo ditugu erabat, su eztian. 20 minutu inguru edukiko ditugu sutan. Bi txandatan egin ditzakegu, trinkotu ez daitezen. Astiro joatea hobe beti ere. Egin ondoren, sutatik atera eta hozten utziko ditugu sagarrak. Gopor batean, irabiatzeko hagaxkaz joko ditugu arrautza, azukrea eta limoi birrindura, nahasturak apar itxura, kolore zurixka eta krema baten antza har dezan arte. 10 bat minutu arituko gara lan horretan. Orduan ipiniko ditugu sagarrak, jada hotzak, moldearen hostorezko hondoaren gainean, ertzetik zentimetro batera, estu-estu eta erdialdean bizkartxo antzekoa osatuz, hauxe da, Jogi hartzak gustuko zituen tarta horietako bat egingo dugu, erdialdean sagar askotxo ipinita. Sagar guztiak behar bezala egokitu ondoren, estali egingo ditugu arrautza, azukre eta limoiaz eginiko nahastura krematsuaz. Hostorezko diskoa ipiniko dugu gainean ondoren. Oinarriko hostorean moldetik irteten den zatitxoarekin ximikoan barrurantz hartuko dugu inguru osoan gaineko hostorea, enpanada bat balitz bezala itxi ahal izateko. Brotxa batekin arrautza gorringo joaz margotuko dugu ondoren tartaren azalera osoa, eta zulotxo batzuk egingo dizkiogu sardexka baten hortzekin, frutaren lurruna kanpora irten dadin eta tarta puztu ez dadin. Labean sartuko dugu ondoren, 200º-ko tenperaturan, 40 bat minutuan, baina lehen 20 minutuetan aluminio-paperez estalita edukiko dugu, gehiegi gorritu ez dadin. Azken 20 minutuetan kendu egingo dugu paper hori. Ongi gorritua eta barrutik heze geratu behar zaigu tarta. Epel edo giroko tenperaturan jango dugu. Ez dugu inoiz ere hozkailuan sartu behar, hostorea bigundu egingo baita bestela.

Etiketak: Sagarra

Istorio hau 2007 Azaroa 12 egunean 21:00-etan argitaratua eta POSTRE ETA GOZOKIAK ataletan sailkatua izan zen. Istorio honi gehituriko iruzkinen jarraipena RSS 2.0 jarioaren bitartez egin. Nahi baduzu, iruzkin bat idatzi dezakezu edo zure webgunetik trackback egin istorio honi.