Sukaldean

Errezeta

Badu honek egiteko bihurri bat, esperientziarik ez dutenentzat zaila: gibelei zainak ateratzea. Horretarako, hobe dugu gibel bigunak aukeratzen baditugu, hozkailuan eduki ez diren eta kanpoko giroan gutxienez 2 ordu eman dituzten gibelak alegia. Bi lobulutan banatuko ditugu gibelak, handia eta txikia, eta ziztada arin bat egingo dugu haietako bakoitzaren luzeran, liburu baten moduan ireki daitezen. Atzeko aldea zimurtsuagoa da eta, kontu handiz, hatzen muturra edo objektu kamuts bat labainduko dugu haren luzeran, erraiak zeharkatzen dituzten zain odoltsuak altxarazteko. Kontu handiz egin behar da lan hau, gibela ez puskatzeko, eta gu bihotzekoak ez jotzeko, ongi baitakigu zein preziotan dagoen foie-gras kiloa. Beste aukera bat da sakon eta leun ziztatu eta ur gazi oso hotzean edukitzea, odol-hodiak ahalik eta neurri handienean hustu daitezen. Ahalegin honi guztiari esker lortuko dugu, gibela moztean eta jaterakoan, zain higuingarri gogaikarrien arrastorik ez agertzea. Bihurri xamarra da egiteko hau, baina ezinbestekoa.

Gure nerbioak ere lasaitu ditugunean, erretilu batean pausatu eta gatza, piperbeltz zuri ehoa eta azukrea emango diegu gibelei, eta armagnac, brandy eta Portoko ardoaz garaztatuko ditugu ondoren. Film edo aluminio-paperaz estali eta hozkailuan utziko ditugu ontzen, 8 bat orduz. Bitarte horretan, irauli egingo ditugu hainbatetan, alde guztietatik berdin busti daitezen.

Kazola batean jarriko dugu salda irakiten; irakin orduko aterako dugu sutatik eta hozten utzi, 80º inguruko tenperaturan egon arte. Lobuluak saldan sartu eta erlojuko 6 minutuan edukiko ditugu alde bakoitzetik. Erretilu batera erretiratuko ditugu, zornatu eta bere zikinak bota ditzan gibelak. Bi orri film edo aluminio-paper hedatu eta lobulu handia eta txikia jarriko ditugu haietako bakoitzean. Beren horretan bilduko ditugu ondoren, txorizo bat balira bezala. Ertzetatik itxi eta ongi estutuko ditugu ondoren.

Hozten utziko ditugu ondoren hozkailuan, hoztu eta gero xerratan moztu ahal izateko. Hobe moztuko ditugu labanaren ahoa aurrez ur berotan eduki badugu. Ebakia garbiagoa izango da hala jokatzen badugu, xerra puskatzeko arriskurik gabe. Ogi txigortuetan jango dugu gibela. Terrina honek gutxienez 15 egun eusten dio hozkailuan, ongi tapatuta edukiz gero. Salda beroak haren gustua hartuko du, izugarria da hark eskaintzen duen ahogozoa. Koipea ongi kendu eta 10 urte gazteagotuko gara hura edan ondoan.