Sukaldean

Errezeta

Orea egiteko: Irina, gatza, arbendol-hautsa, azukreak eta legamia ipiniko ditugu gopor batean. Ongi nahasi eta gurina erantsiko dugu, dadotan moztua, guri xamar. Ongi nahasiko dugu guztia, hatz puntekin. Arrautza erantsiko dugu ondoren. Ongi oratuko dugu guztia, egoki batu arte. Hozkailuan edukiko dugu orea, krema egin bitartean.

Krema egiteko: Eltze giderdun batean, su eztian jarriko ditugu egosten esnegaina, esnea, laranja azal birrindua eta azukre bainilatua. Gopor batean joko ditugu arrautzak azukrearekin, hainbat minutuan, nahastura loditu eta kolore zuria hartu arte. Irina erantsiko diogu ondoren. Arrautza joen gainean isuriko dugu esne irakina; nahasi eta sutan jarriko dugu krema hau egosten, biraka eraginez hagaxka batzuez. Irakin arinean hasi arte edukiko dugu egosten, eltzeari heltzen utzi gabe. Beste pare bat minutuan edukiko dugu su gainean, irakiten hasi ondoren. Rona isuriko dugu bukaeran. Kontu handiz maneatu behar dugu krema, eltzeari ez heltzeko. Hozkailuan gordeko dugu krema.

Pastiza egiteko: Gurin guriz eta azukrez estaliko dugu 22 cm-ko diametroa eta 4 cm-ko altuera dituen molde bat (gutxi gorabeherakoak dira neurri hauek). Orearen erdia arrabol batez zabaldu eta moldean egokituko dugu, ongi estutuz, ertzetik hainbat cm gaindi ditzan. Krema hotza isuriko dugu ondoren orearen gainean, ongi zabalduz, zirrikiturik geldi ez dadin bete gabe. Orearen beste erdia zabalduko dugu ondoren kremaren gainean. Egokitu eta estutuz itxiko ditugu ertzak.

Jotako arrautza batez margotuko dugu gainazala edo estalkia, labetik ateratakoan kolore gorri erakargarri bat izan dezan. Labean sartuko dugu ondoren pastiza, 170º-ko tenperatura, eta 45 bat minutuan edukiko dugu ontzen. Epeltzen utzi eta epel edo giroko tenperaturan jango dugu euskal pastiza.