6 txerri mutur garbi eta ilerik gabe
Baratxuri-buru bat
Porru bat, osorik
Tipulin bat, osorik
Oliba olioa
Ura
Gatza
Irina eta arrautza joa
Oliba olioa, frijitzeko

Kazola batean oliba olio xorta bat isuri eta alde guztietatik gorrituko ditugu hartan txerri muturrak. Erne olio-zipriztinekin! Ongi txigortuta utziko ditugu. Koipe soberakina erretiratu eta baratxuri-burua, porrua eta tipulina irauliko ditugu kazolan. Irauli batzuk eman eta ur beroaz estaliko dugu guztia, 3 hatz gainetik. Gatz pixka bat eman eta kazola estalia utziko dugu guztia egosten bi orduz, erdi irakinean. Kazola ez da ur eskas geldituko, gaiak estaliko ditu beti eta lurrindu ahala berritu beharko da. Xamur daudelarik, kazolatik aterako ditugu txerri muturrak. Egosi diren salda iragaziko dugu ondoren, zopa bat egiteko, gisatu bat maneatzeko edo uraren ordez erabiltzeko… ez dugu, bada, alferrik galduko! Beren epelean utziko ditugu muturrak eta, kontu handiz ez hausteko, kenduko dizkiegu erdialdean ageri dituzten kartilagoak. Puska ertainetan zatitu eta, hoztu direnean, gatza eman, irin-arrautzatan pasa eta oliba olio ugaritan frijituko ditugu, ongi gorritu arte. Xukatu eta allioli saltsarekin edo ziape-maionesa on batekin jango ditugu.

Etiketak: Txerria

Istorio hau 2007 azaroa 12 egunean -etan argitaratua eta HARAGIAK, OKELAK ataletan sailkatua izan zen. Istorio honi gehituriko iruzkinen jarraipena RSS 2.0 jarioaren bitartez egin. Nahi baduzu, iruzkin bat idatzi dezakezu edo zure webgunetik trackback egin istorio honi.