KARDU IRIN-ARRAUTZEZTATUA SALTSAN
Kardu egosi bat, zatitua
Irina
Arrautza joa
Perrexil xehatua
Baratxuri ale bat, xehatua
Oliba edo eguzki-lore olioa, frijitzeko
3 koilarakada oliba olio
Tipulin handi bat, pikatua
Kardua egosi den salda, edontzi handi bat
Zimiko bat irin
Gatza
Saltsa egingo dugu lehenik. Kazola zabal batean, su eztian paratuko ditugu olioa eta tipulin, gatz pixka batekin. Potxatzen utziko dugu tipulina, kolore hartzen utzi gabe eta, xamurtu orduko, ximiko bat irin erantsiko diogu: su eztian utziko dugu, erre gabe. Orburuak egosi diren salda hasiko gara orduan eransten, pixkana-pixkana, saltsa leun lodi xamarra lortu arte. Gatz pixka bat emango diogu ondoren. Saltsa honi tomate saltsa, haragi saltsa –gisatuarena edo– edota, esate baterako, eguerdian erre dugun oilaskoak utzitako saltsa ere erantsi ahal izango diogu, koilarakada gutxi batzuk. Bai eta urdaiazpiko takotxo batzuk ere.
Irinetan axaletik pasatuko ditugu kardu zatiak eta xehaturiko baratxuri eta perrexilez hornituriko arrautza joan igurtziko ditugu ondoren. Olio ugaritan frijituko ditugu ondoren, su ertainean, eta paper xurgagarrian utziko ditugu gero, xukatzen. Puska guztiak frijitu direnean, arrautza-bizarrak kenduko dizkiegu, saltsa zikin ez dezaten, eta su eztian utziko ditugu egosten, 15 minutuan. Ura edo kardua egosi den salda erantsiko dugu, saltsa lodiegi gertatzen ari dela ikusten badugu. Gatza neurtu eta zerbitzatu.
Etiketak: Kardua