Sukaldean

Garaikoa edo asteko errezeta

admin — Thu, 09 Feb 2012 08:28:17 +0000

Astean behin errezeta bat nabarmenduko dugu tarte honetan, garaikoa den errezeta bat alegia. Ordiziako eta Bilboko merkatuen arabera, jaki nagusiak zer preziotan dauden ere zehaztuko dugu.

Hemen ere zuen ekarpenak ongi etorriak izango dira, besteak beste, ikusitako eskaintza bat nabarmentzeko, adibidez: “Joan den astean babarrun kilo bat erosi nuen 10 eurotan Altzako merkatuan”, edo “Errezeta hori egiten saiatu naiz, baina ez dut lortu. Zergatik?”, eta beste batek bere iritzia ematen ahalko dio. Hori da tarte honi eman nahiko geniokeen funtsa.

Ahatearen eguna eta boilur beltzarena

admin — Fri, 27 Jan 2012 14:59:53 +0000

Plan berezia izan daiteke astebururako. Itsasuko herriak (Lapurdi) ahatearen besta antolatu du bihar. 17:00etatik aitzinera, urteko ahatekia nola egiten den erakutsiko dute Sanoki gelan. Nola mozten eta gazitzen den ikasten ahalko da, baita nahi izanez gero, ahate osoak, ahate zatiak eta konfitak erosi ere. Gauean, berriz, afaltzea emanen dute. Ahate axoa izanen da plater nagusia.

Igandean, baina Euskal Herriaren beste puntan, boilur beltzaren eguna egingo dute Pobesen (Araba). Askorentzat ezezaguna den onddo hau nola prestatzen den ikasten ahalko da Donostiako Urbano jatetxeko Patxi Aizpururen eskutik. Onddo bila ibili nahiago dutenentzat, zakurrekin nola bilatzen dira ikusi ahal izango da. Egun osoan boilur beltzan oinarritzen diren hainbat produktu eta plater jastatzeko aukerarik ez da faltako.

Sukaldaritzaren ziliportak

sukaldean — Thu, 19 Jan 2012 16:29:08 +0000

Ziliportak atal honetan sukaldaritzarekin zerikusia duten albisteak bilduko ditugu, berrikuntzak, ikastaroak, azokak eta produktu zehatz bati buruzko jaiak, besteak beste. Komunikabideetan aipatuko eta eskuragarri izango dugun guztia zabalduko dugu hemen. Ezin ukatu denen laguntza eskertuko dela hemen ere, ez bazaigu erraz egingo egunero komunikabide guztiak begiratzea, eta ziur albiste interesgarri batzuk bidean geldituko zaizkigula. Baina sare sozialen bidez, ahaztu dugun hori helarazten bazaigu, lekua egingo diogu.

Aurreko atalekin bezala, eskertuko dugu zuen iritzia Ziliporta izenari buruz. Hala jarri dugu sukaldaritzaren inguruan botatzen direnak aipatuko ditugulako, baina agian ez da izen egokiena, eta baten batek idei hobea dauka.

Begigose, guztion argazkien txokoa

sukaldean — Wed, 18 Jan 2012 17:09:22 +0000

Atal honetan, norberak bere etxean prestatzen dituen platerren argazkiak bildu nahi ditugu, sare sozialetan modan dagoen joera horri tarte bat egiteko, platerra nola gelditzen den erakusteko, baita aurkezteko ideiak gure artean konpartitzeko ere, baina hasieran batean batez ere, sukaldean.com-eko argazki artxiboa aberasten joateko.

1.000 errezeta baino gehiago ditugu gure artxiboan, baina askoz argazki gutxiago. Eta han hemenka lortu baditugu ere, gure helburu horretatik urrun gaude. Uste dugu sukaldean.com oso tresna aberasgarria izan daitekeela sukaldaritza maite dugun euskaldunontzat, baina benetan itxura polita eman nahi badiogu, badakigu denen laguntza beharrezkoa izango dela.

Hasieran Tira! deitu behar genuen atal hori, jaten hasi baino lehen garai batean asko erabiltzen zen esamoldeari erreparatuz. Baina Twitterren eztabaidatzen ibili eta gero, Santi Leonek, @ororostorm-ek, Begigose proposatu du. Izen egokian delakoan, horrekin gelditu gara.

‘Eleketa’, ele keta ibiltzeko

sukaldean — Mon, 16 Jan 2012 14:43:09 +0000

Atal hau Asteko hitza deitu behar genuen, baina Twitterren eta Facebooken lagun batzuekin solastatu eta gero, Eleketa izatea proposatzen dizuegu. Sukaldaritzan erabiltzen diren osagaiak, tresnak, gailuak eta aditz zehatzak izango ditugu hizpide erderara lerratzeko dugun ohitura horri aurre egiteko.

Astean behin, hitz bat jorratuko dugu, haren definizioa, jatorria eta etimologia zehaztuz, nonbait, Maite Goñiren Gaurko Hitzan bezala, baina sukaldaritzarekin lotuta. Hortik, ele keta aritzea da helburua, alegia, denen artean hitz bila aritzea, eta norberak etxean erabiltzen duen asteko hitz horren sinonimo hori gehitzen joatea. Tarte honek ere eleketan, solasean eta berbetan aritzeko izan behar du, eta hori egin badezakegu gure hizkuntza aberastuz eta ondoko ibarreko euskalkia ezagutuz, hobe.

Zer da ‘plazer baduzu’?

sukaldean — Thu, 12 Jan 2012 10:06:55 +0000

Tarte honek web orri honen bihotza izan behar du, erabiltzaileen arteko trukaketa gunea alegia. Norberak bere errezetak, sekretuak eta kritikak idazten ahal ditu hemen. Ez dago dudarik guztien parte-hartzeak aberastuko duela web orri hau, eta arrakasta izango duela sukaldaritzan dauzkagun jakintzak konpartitzeko gai bagara.

Beldurrik ez izan izena eman eta idazten hasteko. Azken finean sukaldaritza ez da zientzia zuzena, eta errezetaren izena berdina izan arren, beti dago zehaztasun bat aldatzen dena etxe batetik bestera. Hemen idazteko ez da sukaldari edo kazetari famatua izan behar. Gogoa nahiakoa da. Txikitasunetik heltzen da handitasunera. Txikitasunetik aberasten da sukaldaritza. Eta txikitasunetik egiten diogu gero eta tarte zabalagoa euskarari gure bizitzan.